Tulisan Foto Grafis Video Audio Project
Kategori Cerpen 15 Mei 2016   08:32 WIB
Preman Kite (Lanjutan Cerita Penderitaan Orang) Bagian 2

Ini cerita keluarga Mpok Monah yang emaknya si Selly yang minggat sama preman kite entu. Babe nerima si Selly sama cucunye yang bergigi dua, Aurel Salsabila Hasanah binti Fakhrulrozi.
Preman kita, Fakhrulrozi alias si Oji Mampang sekarang duduk anget-dingin di kursi sofa bolong ruang tamu rumah nyak-babe si Selly. Sementara si Selly sama mak-bapaknye lagi nangis bombai, melepas kerinduan 1,5 tahun ini. Dunia memang damai, tapi Oji Mampang kok kayak panci bocor, kaga dianggap dalam keluarga orang.

Si gigi dua yang lagi lucu-lucunya, Caca, lepas dari satu gendongan ke gendongan lainnya. Diemek-emek kayak tape uli. Tuh anak bukannya seneng tapi tangisnya kenceng. Kaga biasa mah dia sama orang asing. Biar kata Mpok Monah sama Babe asli kakek-neneknya, bagi Caca mereka masih sama kayak orang asing.

"Ya, Alloh Bang....kaga gitu napah gendong bocah. Tuh kan, nangis. Sini nak..sini...sama umi..," kate Mpok Monah. Si Caca nangis kejer.
"Kaga biase lu gendong bayi, Mon. Udah kasi sini ma gue, lu bau ikan cuwek," tukas Babe.
"Belum biase aje Nyak, Babe si Caca mah. Biasanya kaga rewelan anaknye. Ya kan Bang?" tahu-tahu Selly menyapa Oji Mampang. Si Oji gelagapan. Sekilas Mpok Monah ngelirik mantunye, lirikan tajam. Babe tetap anggap Si Oji kaga ada. Kaga dianggap. Oji sengsara.Dia memilih menunduk, menatap lantai ruang tamu rumah mertuanya yang belum disapu. Ada nasi jatuh di sana. Mending lihat itu daripada muka mertuanya.

"Jangan Caca, Sel namenye. Lu ngasi nama anak kaga-kaga nih. Caca Andika ape ntar dikate tetangga?" kata Mpok Monah. Menimang-nimang cucunya yang tetep kejer.
"Bang Oji manggilnye gitu, Nyak..." jawab si Selly.
Papaan sih si Selly, petotin ke gw mulu segala hal, batin Oji Mampang. Mpok Monah ketebak banget, sekali lagi ngelirik tajem, setajem silet.
"Ichcha aje namenye Sel. Nyak mah demen...." si Selly mesem-mesem.
"Tanye Bang Oji dulu, Nyak...." lagi-lagi nih Si Selly. Nyari bala banget sih.
"Ya terserah mah. Nyak manggilnye Ichcha aje. Noh, lu susuin dulu. Nih anak kejer lu lewat kali pakai getek kaga salamlekum apa? Anak lewat aer segala..."

Karya : Estiana Arifin